Згодна Палажэння аб дзяржаўнай рэгістрацыі суб’ектаў гаспадарання Бялыніцкі раённы выканаўчы камітэт прыняў рашэнне аб змяненні віда і перайменаванні гімназіі №1 райцэнтра ў сярэднюю школу №1 імя Мікалая Іванавіча Пашкоўскага.
Мікалай Іванавіч 12 гадоў з’яўляўся дырэктарам вышэйназванай вучэбнай установы, у 1995 годзе заняў пасаду загадчыка, а затым і начальніка аддзела адукацыі райвыканкама.
35 гадоў жыцця М.І.Пашкоўскі аддаў працы ў галіне адукацыі. Вялікую ўвагу ён надзяляў развіццю матэрыяльнай базы школ і пазашкольных устаноў, стварэнню ўмоў для пераходу на новы ўзровень атрымання адукацыі, дыферынцыяцыі навучання і выхавання, удасканаленню вучэбна-выхаваўчага працэсу і ажыццяўленню пазашкольнага ўпраўлення. Як вынік плённай дзейнасці, Мікалай Іванавіч меў шэраг ўзнагарод. Гэта, да прыкладу, Ганаровыя граматы ўпраўлення адукацыі Магілёўскага аблвыканкама, Граматы Міністэрства адукацыі Рэспублікі Беларусь і многія іншыя.
У гады кіравання М.І.Пашкоўскага аддзел адукацыі 11 гадоў прызнаваўся пераможцам абласнога агляду-конкурсу на лепшую арганізацыю работы сярод аддзелаў адукацыі райвыканкамаў.
Апроч таго, Мікалай Іванавіч з’яўляўся дэпутатам раённага Савета дэпутатаў, старшынёй раённай арганізацыі рэспубліканскага аб’яднання “Белая Русь”, членам калегіі ўпраўлення адукацыі Магілёўскага аблвыканкама.
Год назад Мікалай Пашкоўскі пайшоў з жыцця.