Дзень Святых апосталаў Пятра і Паўла адзначылі жыхары Прыдрутчыны ў аграгарадку Вішоў у мінулую пятніцу. Гэта духоўна-асветніцкае свята праходзіць тут ужо пяты год запар.
Напачатку ўрачыстасці ў мясцовай Петрапаўлаўскай царкве прайшоў вадасвяцкі малебен, урачыстае богаслужэнне, хрэсны ход вакол царквы з удзелам епіскапа Магілёўскага і Мсціслаўскага Уладыкі Сафронія.
Затым у амфітэатры распачалася святочная праграма ўшанавання ветэранаў працы і пенсіянераў СВК «Калгас «Радзіма» пад назвай «Родительский дом — начало начал».
З віншаваннямі і словамі бязмежнай удзячнасці да людзей, дзякуючы адказнасці, добрасумленнасці і працавітасці якіх мясцовая гаспадарка дасягнула значных вышыняў, звярнуўся яе старшыня Аляксандр Лапацентаў.
У гэты дзень у якасці ганаровых гасцей на ўрачыстасці прысутнічалі і ўдзельнікі міжнароднага пленэру па жывапісе, які ўжо двойчы прайшоў на вішоўскай зямлі. Апошні з іх завяршыўся літаральна напярэдадні свята. «Вельмі важна памятаць аб тых людзях, якія сваёй руплівай працай, сваёй бязмежнай любоўю да зямлі ўздымалі нашу краіну», — падкрэсліў заслужаны дзеяч мастацтва Беларусі Уладзімір Уродніч.
У гэты цёплы летні дзень добры настрой не пакідаў нікога. Са сцэны гучалі песні, працавалі гульнёвыя пляцоўкі, гандлёвыя кропкі. Хочацца верыць, што дзень памяці Святых апосталаў Пятра і Паўла надоўга застанецца любімым святам для вішоўцаў.