На беразе Заазерскага возера не першы год запар пачаў працаваць палатачны дзіцяча-аздараўленчы лагер «Брыганціна». Адпачыць у яго першай змене пажадалі 20 хлопчыкаў і дзяўчынак.
Кожны дзень у лагеры праводзяцца цікавыя і разнастайныя мерапрыемствы, спартыўныя спаборніцтвы. Многія з дзяцей выбіраюць «Брыганціну» ў якасці лепшага месца для летняга адпачынку не ў першы раз. Старэйшыя хлопчыкі і дзяўчынкі з’яўляюцца першымі памочнікамі сваіх выхавацеляў. Могуць і ежу дапамагчы прыгатаваць, і тэрыторыю прыбраць, і за малодшымі прыгледзіць. Не скардзяцца адпачываючыя і на харчаванне. У меню абавязкова ўваходзяць мясныя вырабы, агародніна, садавіна, ласункі.
Смутку і дрэннаму настрою ў «Брыганціне» няма месца. У любой сітуацыі і пры любым надвор’і кожны выхаванец знаходзіць сабе справу па душы. Бацькі і дзеці ведаюць: адпачынак на прыродзе робіць рабят больш самастойнымі, дружалюбнымі і працалюбівымі.
Варта адзначыць, што палатачны дзіцячы аздараўленчы лагер «Брыганціна» будзе працаваць тры змены. Адпачнуць у ім і набяруцца сіл перад новым навучальным годам каля 60 школьнікаў.