Раённы этап сямейнага сельскагаспадарчага праекта ГА “БРСМ” “Уладар сяла-2013” прайшоў у мінулую суботу ў аграгарадку Цяхцін. Самыя таленавітыя, смелыя, спартыўныя і ўмелыя пары змагаліся за права называцца лепшай вясковай сям’ёй. Гаспадары і гаспадыні зладжана і паспяхова пераадолелі ўсе творчыя, сельскагаспадарчыя і спартыўныя выпрабаванні: ў арыгінальнай форме прадстаўлялі свае сем’і, на хуткасць нарыхтоўвалі дровы, гатавалі стравы, спаборнічалі ў вясковай спартыўнай эстафеце.
Каля імправізаванай сцэны каля мясцовай школы сабраліся жыхары Цяхціна і госці з іншых населеных пунктаў раёна. Цікавае і відовішчнае мерапрыемства ў кожнага выклікала захапленне і прыўзняты настрой.

У выніку, першае месца і права прадстаўляць Бялыніччыну на абласным этапе рэспубліканскага конкурсу “Уладар сяла” заваяваў саюз Святланы і Дзмітрыя Жыркевічаў з Вялікай Машчаніцы. Другім прызёрам прызнана сямейная пара Белахвоставых з Цяхціна. Трэцяе месца заняла сям’я Лычкоўскіх з Вішова.
Пераможцы і прызёры ўзнагароджаны дыпломамі райкама ГА “БРСМ” і каштоўнымі падарункамі ад ААТ “Новая Друць” і аддзела ідэалагічнай работы, культуры і па справах моладзі райвыканкама.