Нельга не адзначыць тое, што работнікі ААТ “Аграсэрвіс”, працаўнікі вытворчых і сацыяльных інфраструктур Ланькаўскага сельсавета самым сур’ёзным чынам аднесліся да выканання цыклу падрыхтоўчых работ да гэтага агульнараённага свята, выніковага мерапрыемства хлебаробскай справы. Дажынкі – вянец галоўнага клопату не толькі аграрыяў, вяскоўцаў, але і ўсіх. Нездарма кажуць, што калі ёсць хлеб, то і дом тады багаты.
Дый надвор’е ў гэты суботні дзень не падвяло: было цёпла, сонечна, светла.
Адкрылі свята, галоўная сцэна якога размясцілася на падворку Іскраўскай базавай школы, яскравае выступленне юных барабаншчыц і песня “Радзіма мая дарагая” ў выкананні Уладзіслава КАРАЛЁНКА і Дзяніса ДЗЕРАВЯШКІНА з вынасам дажыначнага снопа.
Пасля гэтага пад гукі Дзяржаўнага гімна лепшыя з лепшых удзельнікаў сёлетняга жніва – старшыя камбайнеры Мікалай ДАРЭЧКІН (СВК     “Калгас “Радзіма”) і Сяргей ПЛЕХАЎ (ААТ “Новая Друць”), вадзіцель Аляксандр ЧАЙКОЎСКІ (ААТ “Бялынічы”) узнялі, адпаведна, сцягі Беларусі, Магілёўскай вобласці і Бялынічаў.
На свяце аграрыяў раёна прысутнічалі таксама і ганаровыя госці: намеснік старшыні камітэта па сельскай гаспадарцы і харчаванні Магілёўскага аблвыканкама Аляксандр АДАМАЎ, сенатар Анатоль ДРАЗДОЎ, генеральны дырэктар абласнога Дзяржплемпрадпрыемства Віктар ВІТКОЎСКІ, дэпутат абласнога Савета дэпутатаў Раіса ЛЫЧКОЎСКАЯ, начальнік арганізацыйна-кадравага аддзела абкама прафсаюза работнікаў аграпрамысловага комплексу Генадзь ШПАКОЎСКІ, кіраўнікі гаспадарак, прадпрыемстваў, устаноў раёна, ветэраны працы.
У сваім звароце да прысутных старшыня райвыканкама Мікалай КАДАЦЕНКА адзначыў, што сёлетні агульны каравай Бялыніччыны, без уліку грэчкі і кукурузы, склаў 48 тысяч 603 тоны. У сярэднім, з кожнага гектара хлебнай нівы раёна сабрана па 36,3 цэнтнера зерня. Сапраўды рэкордны ўраджай збожжа сёлета вырасцілі хлебаробы СВК “Калгас “Радзіма”, дзе агульны намалот склаў больш за 21 тысячу тон зерня пры ўраджайнасці 62,5 цэнтнера з гектара.
-Аляксандр ЛАПАЦЕНТАЎ і гаспадарка, якую ён узначальвае, – сказаў кіраўнік раёна, – з’яўляюцца для ўсіх нас флагманамі. СВК “Калгас “Радзіма” на працягу апошніх гадоў спакойна дэманструе стабільны рост у сваім сацыяльна-эканамічным развіцці.
Старшыня райвыканкама выказаў словы падзякі аграрыям за іхнюю стараннасць, руплівасць, любоў да зямлі і адданасць сваёй справе. Таксама ўдзячныя словы ён адрасаваў кіраўнікам і работнікам гарадскіх прамысловых прадпрыемстваў і арганізацый, якія аказалі дапамогу сельгаспрадпрыемствам на перыяд уборачных работ.
Падзяку за граматнае кіраўніцтва, уменне з’яднаць і мабілізаваць калектыў Мікалай Кадаценка адрасаваў і кіраўнікам усіх сельскіх гаспадарак.
У святочнай атмасферы старшыні райвыканкама пад бурныя апладысменты быў уручаны апошні, дажыначны, сноп сёлетняга жніва.
Намеснік старшыні камітэта па сельскай гаспадарцы і харчаванні аблвыканкама Аляксандр Адамаў павіншаваў ўсіх прысутных са святам, паспяховым завяршэннем жніва, дасягнутымі высокімі вынікамі і ўручыў Ганаровую грамату Магілёўскага аблвыканкама трактарысту СВК “Калгас “Радзіма” Генадзю КУЛАКОЎСКАМУ, падзякі – вадзіцелю ААТ “Бялынічы” Аляксандру Чайкоўскаму і старшаму камбайнеру СВК “Калгас “Радзіма” Мікалаю Дарэчкіну. Ганаровымі граматамі камітэта па сельскай гаспадарцы і харчаванні аблвыканкама адзначана эфектыўная праца падчас уборачных работ, гаспадарлівасць і руплівасць вадзіцеля ААТ “Новая Друць” Міхаіла КАДАЦЕНКІ, механізатараў СВК “Калгас “Радзіма” Юрыя САРОКІНА і Яўгена БАЛЬШАКОВА.
Дажынкі без каравая, што вяселле без нявесты. Вось і наступіў адзін са знакавых момантаў раённага свята: складанне агульнага караваю Бялыніччыны з караваеў гаспадарак. Хлебны каравай СВК “Калгас “Радзіма” прадставіў удзельнікам свята галоўны аграном гаспадаркі Аляксандр ЛЕЙБУЦІН, ААТ “Новая Друць” – вадзіцель Васіль ДОЛГІ, райаграпрамтэхзабеспячэння – галоўны аграном Дзмітрый КАТКОЎ, ААТ “Аграсэрвіс” – яго каляжанка Анастасія СТАРАВОЙТАВА, ААТ”Бялынічы” – намеснік дырэктара Раман КАЛЫВАНАЎ. Атрыманы такім чынам раённы каравай 2017 года прадставілі ўдзельнікам свята маладыя хлебаробы Яўген ШАЛКОЎСКІ і Аляксандр КУРАНЦОЎ (СВК “Калгас “Радзіма”), Аляксандр БЕЛАХВОСТАЎ (ААТ “Новая Друць”).
Затым дзяўчаты, апранутыя ў нацыянальныя строі, вынеслі для пачастунку духмяныя пірагі, якія выпеклі з мукі новага ўраджаю збожжа кулінары райспажыўтаварыства.
Пасля гэтага пачалася ўрачыстая цырымонія ўзнагароджвання і ўшанавання пераможцаў раённага спаборніцтва на ўборцы ўраджаю зерневых і зернебабовых культур у бягучым годзе (адпаведнае рашэнне райвыканкама надрукавана ў папярэднім нумары “Зары над Друццю”). Заслужаныя нялёгкай працай у гарачы час жніва дыпломы райвыканкама і грашовыя прэміі ўсім героям сёлетніх уборачных работ пад сардэчныя, гарачыя апладысменты прысутных уручыў старшыня раённага выканаўчага камітэта Мікалай Кадаценка.
Па добрай традыцыі, што склалася ў нашым раёне, менавіта на свяце-кірмашы “Дажынкі” абвяшчаюцца і вынікі конкурсу на званне лепшы сельскі падворак маладой сям’і, які праводзіцца пад патранажам райкама ГА “БРСМ”. Сёлета перамогу здабылі маладыя сем’і Аляксандра і Вольгі ШАРОВЫХ (першае месца) і Сяргея і Іны ЧАЛНАКОВЫХ (другое месца). Заслужаныя ўзнагароды маладым сем’ям-пераможцам уручыла кіраўнік райкама маладзёжнай арганізацыі Наталля БАРОДЗЬКА.
Начальнік арганізацыйна-кадравага аддзела абкама прафсаюза работнікаў аграпрамысловага комплексу Генадзь Шпакоўскі сардэчна павіншаваў хлебаробаў раёна і ўсіх прысутных на свяце ў аграгарадку Іскра з паспяховым завяршэннем уборкі збожжавых культур, высокім ураджаем, адзначыўшы, што СВК “Калгас “Радзіма” па ўраджайнасці зерня ўвайшоў у першую пяцёрку гаспадарак Магілёўшчыны. Ад імя 75-тысячнай арганізацыі прафсаюза аграрыяў вобласці ён падарыў старшыні райвыканкама каштоўнае і ўнікальнае выданне – царкоўную кнігу “Добролюбие”.
Заключным момантам урачыстай цырымоніі ўшанавання герояў сёлетняга жніва стала аб’яўленне падзяк райкама прафсаюза работнікаў АПК. Лідар раённага прафсаюза аграрыяў Станіслаў БУРКО са сцэны свята сардэчна аб’явіў іх камбайнерам СВК “Калгас “Радзіма” Івану АЎТУШЭНКУ і Васілю ЛЯНЬКОВУ, вадзіцелю ААТ “Аграсэрвіс” Ігару ШАЧКО.
На працягу святочнага мерапрыемства пераможцаў жніва цудоўнымі песнямі і танцамі віталі творчыя калектывы раёна. А завяршыла свята канцэртная праграма мастацкай самадзейнасці.
Таксама ў гэты дзень у аграгарадку Іскра прайшоў кірмаш, на якім пакупніку была шырока прапанавана сельскагаспадарчая прадукцыя бялыніцкіх гаспадарак, райспажыўтаварыства, працавалі падворкі ўсіх сельсавета, дзейнічалі разнастайныя выставы.
Свята ўдалося на славу і прайшло на самай высокай ноце ўрачыстага пазітыву! А іначай і быць не магло, бо хлеб – гэта наша жыццё.