Многія з нас хоць раз адчувалі незвычайна моцнае і кранальнае ўздзеянне жывога гучання музычных інструментаў.
Такімі эмоцыямі, напэўна, мог прасякнуцца і кожны, хто бываў на выступленнях народнага аркестра народных інструментаў Бялыніцкай дзіцячай школы мастацтваў.
— Ідэя дэманстраваць выканальніцкае майстэрства не толькі вучняў, але і педагога­ў нашай музычнай школы і яе філіялаў, узнікла ў былога дырэктара Івана ЛАПАЦЕНТАВА, — расказвае заснавальнік і нязменны кіраўнік аркестра, дырэктар ДШМ Таццяна ГАРНАСТАЙ. — Так 26 гадоў таму пачалася гісторыя нашага калектыву.
Сапраўдны жаночы кветнік і адно цвёрдае мужчынскае плячо — менавіта так можна ахарактарызаваць склад аркестра на сённяшні дзень.
Не без гонару Таццяна Вячаславаўна зазначае, што асноўная колькасць яго ўдзельнікаў, — менавіта тыя музыканты, што стаялі каля самых вытокаў стварэння аркестра.
Сярод іх Наталля КАБУШАВА, Галіна ГАРАДКОВА, Ала ЖУРАВОВІЧ, Алена КАПЫЛОВА, Ала САЛДАЦЕНКАВА, Лілія ЛАХЦІКАВА, Наталля НАБОКАВА, Вольга МАІСЕЕНКА, Людміла БЕЛАУСАВА, а таксама нязменная апора калектыву  Яўген МІНЬКОЎ.
Крыху пазней папоўнілі калектыў Таццяна ЛОСЕВА і выпускнікі ДШМ  Ларыса ХАРТАНОВІЧ, Вікторыя АЛЯКСАНДРАВА, Таццяна АШВІЛАВА, Кацярына ДАРОШЧАНКА, Іна ШТРУБА. Сярод самых маладых, але не менш таленавітых, хто нездарма абраў сваім жыццёвым шляхам менавіта творчасць, — Таццяна СЕМЯНІСТАЯ і малады спецыяліст Анастасія ІГНАТАВА.
Па словах Таццяны Гарнастай, пастаянны склад аркестра ў спалучэнні з узаемапаразуменнем паміж яго ўдзельнікамі, асабістая адказнасць кожнага за агульную справу выпрацоўваліся цягам гадоў і маюць вялікае значэнне ў зладжанасці аркестровага выканання.
Штогод таленавітая творчая каманда ўдзельнічае ў раённых культурна-масавых мерапрыемствах і святах. Сваю канцэртную праграму яна неаднаразова прадстаўляла на розных абласных і рэспубліканскіх мерапрыемствах.
Спрыяючы развіццю музычнага мастацтва, за гады свайго існавання калектыў заняў важнае месца ў культурным жыцці нашага горада і вобласці. Шматлікія ганаровыя граматы і дыпломы — добрае гэтаму сведчанне.
Рэпертуар аркестра пастаянна абнаўляецца, а творчы партрэт яго паступова набывае новыя фарбы. У цяперашні час распрацоўваецца асобная праграма да ХХVII Дня беларускага пісьменства. Падчас святочных мерапрыемстваў мусяць прагучаць як новыя нумары, так і лепшыя кампазіцыі мінулых гадоў.
Падчас гутаркі з кіраўніком аркестра стала зразумела: тое, што адбываецца на сцэне падчас выступленняў, — гэта толькі вяршыня айсберга. Той хвіліне, калі слухач зможа атрымаць асалоду ад музыкі, папярэднічае цяжкая праца, якая займае ў сярэднім паўгода: ад пошуку дырыжорам партытуры для новага твора, працы ў калектыве, калі кожны яго ўдзельнік можа зрабіць свой асабісты ўнёсак, і ўрэшце, да прывядзення музыкальный кампазіцыі ў дасканалы варыянт.
— Наш аркестр — гэта згуртаваны калектыў з вялікімі творчымі планамі, — прызнаецца Таццяна Гарнастай. — Агульнымі намаганнямі мы і надалей будзем імкнуцца абавязкова ўвасабляць іх у жыццё.

­

Вольга НАБОКАВА.