29 чэрвеня 1944 года тэрыторыя нашага раёна была вызвалена ад нямецка-фашысцкіх захопнікаў. Напярэдадні 77-й гадавіны гэтай даты ў Бялынічах прайшоў урачысты мітынг, удзел у якім прыняло кіраўніцтва раёна, прадстаўнікі працоўных і грамадскіх арганізацый, жыхары і госці нашага горада.

Старшыня райвыканкама Васіль ЗАХАРЭНКА ў сваім выступленні адзначыў, што падчас акупацыі раёна маёмасць усіх арганізацый і прадпрыемстваў была абрабавана і знішчана, спалена жывымі, расстрэлена і закатавана больш за 3 тысячы мірных жыхароў.

– Дзякуючы патрыятызму, гераізму і мужнасці нашага народа, актыўнай дзейнасці партызан і падпольшчыкаў, быў прадвызначаны правал гітлераўскага плана. Удзел у Вялікай Айчыннай вайне прынялі каля 10 тысяч жыхароў раёна. Яны праявілі сябе годнымі сынамі сваёй Радзімы ў баях пад Магілёвам, Масквой, Ленінградам, на Курскай Дузе, фарсіравалі Днепр, вызвалілі ад акупантаў не толькі родную Беларусь, але і краіны Балтыі, Украіну, Польшчу, штурмавалі Берлін, – сказаў Васіль Аляксеевіч. – Мы ні ў якім разе не павінны дапусціць паўтарэння той жудаснай вайны.

Усе прысутныя, у тым ліку і ўдзельнікі рэгіянальнага конкурсу выканаўцаў патрыятычнай і маладзёжнай песні, прысвечанага памяці Героя Савецкага Саюза Леаніда Лорчанкі, усклалі кветкі да брацкай магілы на Алеі герояў у Ліпавым гаі.

Наталля БАРОДЗЬКА.

Фота аўтара.

zara.by